ايام الدراسة بالجامعة كانت كتير من الاراضي هناك جنب الجامعة وصويلح مزروعة قمح، بس هللأ وللأسف كل هالأراضي الزراعية الخصبة صارت مزروعة عمارات لأنه عمّان بتمدد للغرب على حساب الأراضي الزراعية وبتترك وراها الأراضي الشرقية الصحراوية فاضية زي ما هي وفي أصوات حالياً بتنادي الى توقف امتداد عمان غرباً والتحول الى تعمير شرق عاصمتنا. في بداية الصيف كانوا يحصدوا جزء من القمح وهو صغير لسّة ويحمصوه ويدخنوه في أكوام على حافة الطريق. هيك بيحضروا الفريكة وأنا كنت آخد إمّي تشوفهم وتشتري الفريكة الطازة من الحقلة. فكلنا في الاردن وفلسطين بنعرف قديش الفريكة مع الجاج زاكية. لكن يمكن ما بيعرف الكل انها كتير كتير مفيدة كمان.
ليش؟ لأنه سنابل القمح وقت حصاد الفريكة بتكون لسة صغيرة وتقريباً خضرا ولهدا السبب فيها فيتامينات وعناصر معدنية اكتر من باقي الحبوب. الفريكة بتعطيكِ اربع اضعاف الألياف الغذائية الموجودة في الرز البني اللي هالأيام الكل بيتغنى بفائدته. الألياف زي مبتعرفي احسن إشي بيحبه خصرك النحيف الحلو. في ٢٠١٠ فرجت دراسة انه الألياف بتحميكِ من زيادة الوزن. وفي داخل المعدة بتلعب الفريكة دورها في تغذية البكتيريا المفيدة للجسم اللي عايشة هناك على طول للمساعدة في عملية الهضم.
الطريقة التقليدية في تحضير الفريكة بجاج معروفة. علشان هيك سلمى بدها تعرفنا هون عطريقة مختلفة وزاكية لتحضير غداكم بالفريكة. بون ابيتيت.

المقادير

ملعقتين كبيرتين من الزيت
بصلة متوسطة الحجم مفرومة ناعمة
فص ثوم مفروم أو مدقوق
حبة فلفل حلو أحمر مفروم ناعماً
ملعقتين كبيرتين من عصير الليمون
نصف كيلو سبانخ مفروم
ملعقة كبيرة من النعنع الأخضر المفروم أو نصف ملعقة صغيرة من النعنع الناشف
ملعقة صغيرة كمّون
١/٨ ملعقة صغيرة مِلح
١/٨ ملعقة صغيرة فلفل أحمر
فنجان فريكة أو قمح مجروش
فنجانين من الحمص المسلوق
٣/٤ ٢ فنجان زبيب أو أقل إذا كنت لا تفضلي الطعم الحلو للأكل
٣/٤ فنجان من مرق الدجاج
فنجان لبن (زبادي) قليل الدسم

الطريقة

١- أشعلي الفرن على درجة 350 فرنهايت واتركيه ليحمى. في هذه الأثناء سخني الزيت فوق نار متوسطة/عالية في طنجرة كبيرة سعة ٤ لتر قابلة لوضعها داخل الفرن لاحقاً. أضيفي البصل والثوم والفلفل الأحمر ثم الليمون وخفضي الحرارة وغطي الوعاء واتركيه لمدة خمس دقائق أو حتى يصبح البصل طرياً.
٢- أضيفي السبانخ والنعنع والكمون والملح والفلفل الأحمر والفريكة والحمص والزبيب ومرق الدجاج. علَي حرارة النار واتركي المزيج حتى يغلي ثم غطيه وانقلي الوعاء إلى الفرن واتركيه لمدة 35 دقيقة أو حتى ينشف الماء. وزعي الطعام على الصحون وأضيفي ربع فنجان لبن فوق كل صحن ويمكن تزيينه بلبلوبة من البقدونس.

المعلومات الغذائية

يحتوي الصحن الواحد على ٤٩٤ سعر حراري و ١٢ غرام من الدهون منها ٢ غرام من الدهون المشبعة و ٢١ غرام من البروتين و ٨٥ غرام من الكاربوهايدرات و ١٣ غرام من الألياف و ٣٧١ ملليغرام صوديوم و ٤ ملليغرام من الكوليسترول.