التطعيم ضد الإنفلونزا والفحص السنوي للثدي إشيين في بالي هالأيام. 

هل ضروري نطّعم للإنفلونزا السنة

مع إنه الطقس لسة بياخد العقل والخَضار والأزهار في كل مكان إلا إنه في الواقع صرنا في فصل الخريف. فصل جميل بطريقته بس هو غصبن عنه مقدمة لفصل الإنفلونزا اللي بيبدا بشهر تسعة حتى شهر تلاتة. وبما إنه فيروس الإنفلونزا بيتغير كل سنة لازم ناخد مطعوم جديد كل سنة لأنه مطعوم السنة الماضية ما رح يحمينا. مننصح الكل يتطعم وخاصة الأطفال والحوامل وكبار السن والناس اللي بيشتغلوا في المهن الصحية اللي بتتعامل مع المرضى بشكل دائم.

الإنفلونزا مش زي الرشح العادي لأنها بتسبب تعب أكتر وحرارة وبتمنع الإنسان عن العمل وكمان ممكن تطور لإلتهاب أقوى في الرئتين وأحياناً بتسبب الوفاة . عشان هيك أنا ما بستخف فيها وبحرص على أخد المطعوم وتطعيم عيلتي ومريضاتي .

سرطان الثدي مش ضروري يقتلنا

أما الشغلة التانية اللي موجودة في دفتر مواعيدي ولازم تكون في دفتر مواعيدك إنت كمان وكل ست بالدنيا فهو الفحص السنوي للثدي. تشرين أول صار شهر رمز في كل الدنيا لتزكير كل الستات بالحصول على الفحص السنوي للكشف المبكر والوقاية من خطر سرطان الثدي. ليه هادا مهم؟

السبب هو انه سرطان الثدي بيصيب ست بين كل تمانية ستات وممكن يدق باب كل عيلة. الفحص السنوي بسيط وكلفته بسيطة وهو عبارة عن فحص سريري بتعمللك ياه الدكتورة في العيادة. هادا ازا كان عمرك أقل من أربعين سنة. أما اللي فوق الأربعين فبيحتاجوا فحص بالأشعة — ماموغرام — برضو كل سنة مرة أو في بعض الحالات كل سنتين.

سرطان الثدي في أوله كتير قابل للشفاء – فوق تسعين بالمِيّة. وعمليه استئصاله ممكن تكون بسيطة وزغيرة. أمثلة كتيرة مشهورة ومش مشهورة أصابهم السرطان وتغلبوا عليه وآخرهم ازا بتتزكروا إليسا.