في ناس بيفكروا انه اللي بيعملوه في الحمّام شغلهم وحدهم ومش شغل اي حدا تاني لكن…

بيعجبني زكائك… طبعا هم غلطانين، وغلطانين كتير كمان.

زي ما بتعرفي روحة الحمام في الاماكن العامة مش نزهة. الحمام مكان مش لطيف والاشيا اللي بتصير فيه مش لطيفة… والها ريحة كمان. ولهادا السبب بالزات مهم مراعاة الاصول والإنتباه لكل حركة او تصرف في الحمام خاصة الحمامات العامة: في المطعم والسينما والمطار والمول او في الشركة والمكتب والمستشفى او حتى في البيت، فنادرا بيكون الحمام بالبيت بيخص شخص واحد دون باقي العيلة.

ارض الحمام اكبر ملعب للبكتيريا فيه!

فيه ٢٠٠ مليون جرثومة في كل انش مربع من ارض الحمام. قشعر بدنِك؟

ما بَستغرب، فأرض الحمام فيها زحمة اكتر من سوق المهاجرين في عمّان القديمة. وعليها جراثيم أكتر من مقعد المرحاض نفسه اللي، سامحوني، بس رح اسميه هون.. تواليت. مش لسبب إلا لأنها كلمة أحن عالأدنين من كلمة “مرحاض” لكنها ما بتغير من الحقيقة القاسية اللي بتقول انه فيه ألف جرثومة في كل إنش مربع على مقعد التواليت.

المحافظة على أرض الحمام ناشفة بيساعد في تصعيب الحياة عالبكتيريا اللي ما بتتكاثر بنفس السهولة والسرعة في الأماكن الناشفة. كمان هي لفتة بتدل على احترامنا لباقي الناس اللي رح يستعملوا الحمام بعدين، فكما تعلمين احترام الغير هو حجر الاساس في التصرف الحضاري الأخلاقي.

تنظيف الحمام بعد استعماله لفتة حضارية

مش انا وحدي اللي بقول هيك. اسعدتني قراءة هادي الجملة في حمام طائرة الخطوط الملكية الأردنية. لا بد إنهم تعبوا من منظر حمامات الطائرة بعد مرور كم ساعة من بداية الرحلة… أو يمكن بعد استعمال أول راكب لها! لازم يِنتَرَك الحمام مرتب ونظيف  زي ما بنحب نلاقيه لما ندخله. لازم ننشف المغسلة والكاونتر القريب، وكمان مقعد التواليت إزا تبلل. ضروري نمسحه بمنديل الورق النظيف وفي النهاية نرمي الورق المستعمل في مكانه الطبيعي.

هل لاحظتي كيف الحمامات العامة تشبه ملاعب كرة السلة؟

استعمال الورق لتنشيف الايدين صحي اكتر من استعمال جهاز التنشيف بالهوا لأن الجهاز بيشفط هوا الحمام المحمل بالجراثيم وبيكوِّمها على إيديك. أما المكان الطبيعي للورق المستعمل فهو سلة المهملات ومش الأرض. الحمام مكان مش مناسب للتدريب على التصويب في لعبة باسكتبول. كمان ما بيحل حوض مقعد التواليت محل سلة المهملات لأن الورق ما بينزل لما ينسَحَب السيفون وبيسِد التواليت والمصارف. طبعاً الورق مجاني لكن ما بيعني هادا إنه مقبول استعمال عشرين ورقة مع سوا لتنشيف إيدين تنتين. هون بتظهر الأخلاق والعقل كمان، لأن الاقتصاد في عدد الورقات مفيد للبشر وللكوكب اللي هو بيتنا جميعا، فمشكلة نفاياتنا نحن البشر صارت خطر بيهدد الكوكب برمته!

وأخيرا،ً هناك مشكلة … الريحة

أينعم، الريحة طبيعية لكن أكيد بتوافقي إنها مش مرغوبة. وغاز الميثين مش ممكن عمره يصير يطلع في إعلانات التلفزيون اللي بتقطع مسلسلك المفضل ميت مليون مرة. المحافظة على أرض الحمام نظيفة وناشفة بعد استعماله تلقائيا بتخلي ريحته أنظف ولكن هناك عدة خطوات تانية للتخفيف من الريحة. أولها تجنب تناول الماكولات المزعجة من فاصوليا وبصل وملفوف وغيره قبل ما يطلع الانسان لمكان عام او اجتماع عمل او حفلة أو مطعم. أما الخطوة التانية فهي سحب السيفون مرة او مرتين قبل الانتهاء من إإإ… القصة، وسحبه كمان مرة تانية أو تالتة عند الانتهاء ولكن بعد تنزيل غطا التواليت (يعني قبل سحب السيفون) لأن هادا التكتيك اللي بيمنع انتشار الريحة ضروري للتقليل من انتشار الجراثيم كمان. فهادي الجراثيم بتصعد مع أبخرة الماء الخارجة من التواليت عند سحب السيفون. أظن سمعتك بتقولي: وليش هادا مهم؟ والجواب إنه الجراثيم اللي بتتطاير في الهوا رح تنتقل وتستقر على الحنفيات وايدين الابواب وعلى الكاونتر والمغسلة والصابون وتنتقل من شخص للتاني، أحيانا مسببة للأمراض.

اما الخطوة التالتة فهي، الكاموفلاج. أغلب الستات بيحملوا قنينة عطر زغيرة في جزدانهم ورشة زغيرة في الهوا بعد استعمال التواليت مش مكلفة وفي رايي ممكن تعتبر صدقة واحسان للناس اللي فايتين بعدين. والرجال ممكن يحملوا معهم قنينة كولونيا زغيرة تفي بالغرض نفسه.

غسل الإيدين بعد استعمال الحمام في مصلحة الكل

بتمنى ان تكون هادي العادة صارت اوتوماتيكية عند كل الناس، فهي اول خطوة في محاربة الاسهالات وتسمم المعدة والامعاء في البيت وبرة. وممكن يكون استعمال الحمام فرصة للحد من انتقال الرشح والانفلونزا كمان، خاصة بين ايلول واذار من كل سنة. وبما إنّا فتحنا هالموضوع لازم أزكِّر كل ست حامل إنها تاخد المطعوم vaccine ضد الانفلونزا الآن، ولازم أزكر كل ام انها تعطيه لبناتها واولادها الزغار، وكمان لكبار السن في كل عيلة. طبعا، الكل بيستفيد من أخذ المطعوم في كل الأعمار لكن بالأخص المعرضين أكتر للمشاكل، يعني الحوامل والاطفال الزغار والكبار بالسن.