ضمة روكا، يعني جرجير
كيس لوز مقطع شرايح
شوية پارميزان
جارة سلمى عندها شجرة لوز اخضر في جنينتها بتنشف كل سنة نص الحمل بعد ما يشبعوا الولاد من اكل اللوز الأخضر مع شوية ملح. في زاوية شرقية من جنينة الجيران في حوض روكة زرعته الجارة في أول الربيع. رشت كمشة بزر يوم الجمعة ويا دوب غطتهم بشوية تراب أحمر من تراب عمّان الغني ورشرشتهم كل يوم بالمي وفي الجمعة اللي بعدها طلت براعم الروكا، واليوم بدا الحصاد كل صبحية لتحضير سلطة كل غدا عندهم. اما سلمى ما إلها الا تروح عالسوق اليوم عشان تحضر سلطتها. لكن معليه – بيستاهل الجرجير لأنه خضار سوپر ففنجان واحد فيه ١٢٥ ملليغرام كالسيوم بيبني عظمك وبيحميك. رشي فوقه ١٢ حبة لوز شرائح وملعقة پارميزان كبيرة واحصلي على ٩٠ ملليغرام اضافية من الكالسيوم في صحن السلطة. رشة ملح ورشة زيت زيتون وعصرة لمون وخلصتي.
بون أپيتيت.
