فائدة البيض والخطر منه..

انخفض استهلاكنا من البيض في الأردن في شهر رمضان عشرين بالمائة. بقدر افهم ليه. بتلاقي البيضة المسكينة منافسة كبيرة على سفرة رمضان.. كل هالمقبلات الزاكية والأطباق الرئيسية التقيلة. بس في الواقع إلنا سنين منخفف من أكل البيض بعد ما ارتبط البيض بسمعة سيئة بخصوص زيادة الكوليسترول في الدم لأنه البيض نفسه فيه كوليسترول. لكن عالسمعة العاطلة لازم ننساها لأنه طلعت دراسات وابحاث كتيرة جديدة وقديمة بتثبت إنه ما في خطر من الكوليسترول الموجود بالبيض بل الخطر موجود من الدهون المشبعة في مصادر تانية للدهون الحيوانية لأنها بتتحول لكوليسترول وبترفع نسبته في الدم. مافي داعي للحد من عدد البيضات اللي مناكلها بالأسبوع وجمعية القلب البريطانية عم بتقول هالكلام من سنة ٢٠٠٧ . اذا أكلتي بيضة كل يوم حسب آخر دراسة من الصين على نص مليون بني آدم مش بس ما بتزيد احتمال الإصابة بأمراض القلب والشرايين بل ممكن تقلل امراض القلب والجلطة الدماغية. وفي تعليق بروفيسورة من جامعة كيمبردج اسمها نيتا فروحي على نفس الدراسة الصينية أكدت انه البيض ما بيضر.

شو رأي الطب الحديث في فائدة البيض والخطر منه. خلينا نلخص الموضوع فالمهم نتزكر انه طريقة طبخ البيض هي اللي مهمة من ناحيتين — الوقاية من السالمونيللا والتقليل من الدهون المشبعة.

طبخ البيض

اكتر طريقة صحية لأكل البيض هي السلق. من ناحية، ما منكون أضفنا إله دهون مشبعة من الزيوت والزبدة والمارجرين اذا قلينا البيض وبنفس الوقت اذا سلقنا البيض مزبوط وصار صفاره جامد ومش مِرِء منقلل خطر السالمونيللا اذا كانت موجودة أصلاً في البيضة.

طازة وللا لأ ؟

يمكن الكل بيعرف ازا حطيتي البيضة في ماء بارد ونزلت البيضة للقاع يعني البيضة طازة أما اذا طاشت عند سطح الماء معناه انه البيضة مش طازة.

حفظ البيض بعد الشراء

لازم ينحط البيض في التلاجة بدون غسله. بس لازم تكوني نقيتي بيض مش مشقوق أو مكسور لأنه ممكن يتلوث بالبكتيريا ويسبب المرض. خلي البيض محفوظ في علبته الأصلية أو أي علبة مسكرة بغطايتها. اذا فقشتي بيضة وما استعملتيها ممكن تحفظيها في التلاجة لمدة تلات ايام للصفار اما بياض البيض فبيضل تلات اسابيع على شرط تغطيهم بورق النايلون وممكن ينحفظ البياض والصفار في الفريزر لمدة تلات شهور.
في اغلب البلاد يلزم القانون إنه ينكتب تاريخ صلاحية استهلاك البيض على العلبة وعادة بيكون اربع اسابيع بعدما تبيضة الدجاجة ولازم تهتمي بهادا التاريخ وما تتعديه.

كم بيضة تاكلي باليوم؟

ما تخافي.. بيضة او حتى بيضتين كل يوم أمان وفيهم فايدة بس حاولي تاكليهم بطريقة صحية يعني مسلوقين في اغلب الاوقات . فالبيض غني بفيتامين ب١٢ وفيتامين أ وفيتامين د والبروتين وكمان بيحمي النظر والعيون عند كبار السن لأنه فيه لوتين وزيزانثن. حاولي تكتفي برشة فلفل أسمر على البيض بدون ملح وعودي ولادك من زغرهم انهم ياكلوا البيض بدون ملح.